Politika e privatësisë

Për t'u plotësuar para botimit: emri ligjor i kompanisë, adresa, dhe adresa e kontaktit për privatësi ([EMRI LIGJOR], [ADRESA], [EMAIL]).

Kush e përpunon

Shërbimi ofrohet nga [EMRI LIGJOR], me adresë [ADRESA], Kosovë. Për pyetje mbi të dhënat, shkruaj te [EMAIL].

Dy role të ndryshme, dhe pse ka rëndësi

Për të dhënat e llogarisë tënde — emaili, emri, fjalëkalimi, kompania — kontrolluesi jemi ne.

Për të dhënat që ti i fut në program — punëtorët, pagat, numrat personalë, xhirollogaritë, faturat, pasqyrat bankare — kontrolluesi është kompania jote. Ne i përpunojmë vetëm në llogari tënde, sipas udhëzimit tënd, si përpunues. Kjo do të thotë: ne nuk i shikojmë, nuk i analizojmë dhe nuk i përdorim për asnjë qëllim tjetër. Obligimet ndaj punëtorëve — informimi, ruajtja ligjore, kërkesat e tyre — mbeten te kompania.

Çka mblidhet

Nga llogaria

• Emaili dhe emri që shkruan gjatë regjistrimit.
• Fjalëkalimi, i ruajtur vetëm si hash Argon2. Teksti i tij nuk ruhet kurrë dhe nuk mund të lexohet nga ne.
• Emri i kompanisë dhe NUI-ja.

Nga përdorimi

• Sesionet e pajisjeve: data e krijimit, hera e fundit e përdorimit, adresa IP dhe përshkrimi i shfletuesit ose aplikacionit. Këto shërbejnë për të treguar ku je i kyçur dhe për t'i revokuar sesionet — sidomos kur humbet një telefon.
• Regjistri i veprimeve brenda kompanisë (kush ruajti çka, kur), që një ndryshim i gabuar të gjendet.

Nga ti, për punën

• Punëtorët: emri, numri personal, xhirollogaria, banka, paga.
• Faturat e shpenzimeve dhe fotografitë e tyre.
• Pasqyrat bankare që ngarkon (CSV ose PDF).
• Klientët dhe faturat e daljes.

Forma e kontaktit

Kur shkruan te forma e kontaktit, mblidhen emri, email-i dhe mesazhi — dhe, nëse i shkruan vetë, kompania, telefoni dhe sa përdorues do kyçen. Baza ligjore është interesi i ligjshëm për t'u përgjigjur një kërkese që ti e nis.

Mesazhet ruhen në të njëjtin server me aplikacionin, nuk kalojnë nëpër shërbim të palës së tretë, dhe nuk shtohen në asnjë listë postare. Mbahen deri një vit nga përgjigjja e fundit, e pastaj fshihen. Nëse duash të fshihet më parë, kërkoje.

Fotografitë e faturave

Leximi i faturës (OCR) bëhet në serverin tonë, me Tesseract të instaluar lokalisht. Fotografia nuk dërgohet te Google, Amazon, OpenAI e te asnjë shërbim i jashtëm OCR-je. Kjo ka kosto — leximi është më i thjeshtë sa i një shërbimi të madh — dhe zgjedhja është e qëllimshme: një faturë mban emrin e furnitorit, shumat dhe shpesh të dhëna të tjera që nuk kanë punë te palë e tretë.

Aplikacioni mobil heq metadatën EXIF — përfshirë vendndodhjen — para se fotografia të dërgohet. Kur heqja nuk arrin të bëhet, aplikacioni e thotë hapur në ekran, e nuk e ngarkon në heshtje.

Ku ruhen

Në një server me qira në Bashkimin Evropian, te Hetzner Online GmbH. Databaza është një, me të dhënat e secilës kompani të ndara dhe të filtruara sipas kompanisë në çdo kërkesë. Lidhja bëhet vetëm mbi HTTPS.

Gjurmuesit

Kjo faqe nuk ka asnjë gjurmues, asnjë cookie reklamimi, asnjë Google Analytics, asnjë piksel Facebook-u dhe asnjë font të jashtëm. Prandaj nuk ka as banderolë pëlqimi për cookie — nuk ka çka të pëlqehet.

Aplikacioni përdor një cookie sesioni (në shfletues) ose një token të ruajtur në Keychain/Keystore (në telefon). Ato mbajnë kyçjen, e nuk gjurmojnë sjelljen.

Kujt i dërgohen

Të dhënat e tua nuk shitën, nuk shkëmbehen dhe nuk i dërgohen palëve të treta për reklamim. Përjashtimet e vetme:

• Hetzner — si strehues i serverit. Nuk i shikon të dhënat; i ruan diskun mbi të cilin ato jetojnë.
• Kur e kërkon ligji nga një autoritet kompetent, me bazë ligjore.

Sa mbahen

Sa e mban llogarinë, plus periudhën që e kërkon ligji. Të dhënat e pagave në Kosovë kanë afate ligjore ruajtjeje që i takojnë kompanisë tënde; prandaj fshirja e një llogarie nuk fshin gjithmonë menjëherë të dhënat e pagave.

Të drejtat e tua

Mund të kërkosh qasje, korrigjim, eksport ose fshirje. Eksporti nuk kërkon kërkesë: CSV-ja për pagat, faturat, shpenzimet dhe listën e ATK-së është brenda programit dhe punon kurdo.

Fshirja e llogarisë: për tash bëhet me kërkesë te [EMAIL], dhe kryhet brenda 30 ditësh. Fshirja direkt brenda aplikacionit është në ndërtim. Kur llogaria është pronari i vetëm i një kompanie, para fshirjes duhet caktuar një pronar tjetër ose vendosur fshirja e tërë kompanisë — përndryshe të dhënat e kompanisë do mbeteshin pa pronar.

Siguria

• Fjalëkalimet: hash Argon2, kurrë tekst i lexueshëm.
• Kredencialet e integrimeve: të kriptuara në databazë.
• Vetëm HTTPS; cookie-t e sesionit të shënuara Secure.
• Sesionet e pajisjeve shihen dhe revokohen nga përdoruesi.
• Çdo kërkesë filtrohet sipas kompanisë; rolet ndajnë leximin nga shkrimi.

Asnjë sistem nuk është i pathyeshëm, dhe kjo faqe nuk premton përsosuri. Nëse ndodh një shkelje që rrezikon të dhënat, njoftohesh.

Fëmijët

Shërbimi është për kompani. Nuk drejtohet fëmijëve dhe nuk mbledh me dije të dhëna të tyre.

Ndryshimet

Kur kjo politikë ndryshon në thelb, njoftohesh me email para se ndryshimi të vlejë. Data e përditësimit është në kokë të faqes.